過毋外久，忽然，鏡頭裡底遠遠蹤出現一位歐吉桑，一溝跳過一溝，真緊逐蹤倚來，對阮一直咧喊：「少年耶！汝咧翕什麼？汝勿愛擱翕囉。」口氣帶着淡薄兮憤慨。伊兮後壁面擱跟着一個身軀蹻佝兮歐巴桑，表情看起來足緊張兮款，誠親像是受到什麼驚嚇。
　

「我佇咧翕像(3)啦！遮(4)兮黃昏誠媠(5)咧。咁有發生什麼代誌？」我誠細膩兮向伊們解 說，但心肝底嘛有稍可擔心，是不是我去侵犯着伊們兮厝地。

「少年仔！勿愛擱假仙囉啦，汝一定是環保局兮人。」歐吉桑迹擺講話兮口氣，加上伊比出來兮手勢，親像毋放我煞。 

聽到遮，我逐知影發生什麼代誌。但毋擱伊們根本毋愛予我解說兮機會。
　

「大昨日，阮庄內兮慶昌仔逐是予恁翕着咧燒西瓜藤，聽講一張單着愛罰三萬箍(6)。汝勿會使擱安咧做，好心好幸兮 啦！」踦佇邊仔兮歐巴桑用懇求兮眼神佮我拜託。 

歐吉桑不滿兮心情，寫佇面仔。喘了一口大氣，馬上又擱講煞落去：「我佮汝講，阮綁(7)台糖這塊地種西瓜，今年這冬真正誠淒慘，予雨水淹死卜一半，實在賺毋什麼食。燒西瓜藤、塑膠布，嘛毋妨害交通，恁(8)誠是咧罰頭殼一孔。」歐吉桑講話誠斗力，目頭打規結。
　

「歐吉桑、歐巴桑，我真正毋是環保局兮人啦。我逐住佇二林舊社，翕像是我兮趣味，恁那毋相信恁看……。」我一面講，一面將掛佇胸坎前兮數位式翕像機，拍開展示（Display）兮畫面，一張一張解釋予伊們聽。 

逗逗伊們(9)兮面相則卡有稍可(10)放心兮款，但看兮出來，伊們抑無完全相信我講兮話。三個人佇樹仔跤，看完所有兮相片，歐巴桑原本青筍筍的面色，則卡恢復着血色，歐吉桑卜走兮時陣，咁哪講一句：「黑嘛嘛！啊無看半人。」逐擱開始去做伊兮事頭囉。

感覺誠歹勢，逐因為家己兮心適，攪擾着伊們原本平靜兮生活。無什麼心情擱再翕下去，心肝內底誠擔心今暗伊們兩個老伙仔，一定會睏勿會落眠。 

卜走兮時陣，我彎頭佮伊們倆個老伙仔講：「暝仔再，我會擱來！請恁相信我逐個少年仔。」想講安咧，看兮當安貼着伊們驚嚇兮心。雖然心內底知影伊們兩個老伙仔燒西瓜藤佮塑膠布會造成空氣污染，是毋好兮代誌； 毋擱現此時迹毋是我關心兮重點。
　

隔轉工，照講照行，準時來到這遍台糖兮甘蔗地，但是遮已經是清氣溜溜囉。看無着兩位老伙仔，嘛等無着黃昏兮日頭，偆(11)我一個人佮田溝仔頂一堆、一堆揚揚飛兮火灰。 

這時陣，輕可(12)兮心情，則綴着(13)火灰鬥陣做伙飛起來，一直揚揚飛起來…。

                 阿達碼 2005/8/15寫佇彰化芳苑

 解說:
（1）細膩：小心。（2）逐佇：就在。（3）翕像：照相、攝影。（4）遮：ㄓㄜ，這裡。（音假借字）（5）誠媠：ㄕㄨㄟˇ，真是漂亮；真是美麗。（6）箍：圓、元。（7）綁：租賃。（8）恁：你們。（9）逗逗伊們：ㄉㄡˋㄉㄡˋ 一ㄣˇ，慢慢地他們。（10）稍可：ㄕㄠ ㄎㄨㄚˋ，稍微。（11）偆：ㄘㄨㄣ，剩下。（12）輕可：ㄑ一ㄥ ㄎㄨㄚˋ，輕鬆、輕盈。（13）綴着：ㄉㄨㄟˋ ㄓㄠˊ，跟著。